News Update :
Home » » Autonomia Vêneta e Catalã (em língua veneta)

Autonomia Vêneta e Catalã (em língua veneta)

I ne cònta la storièta ca Catalàni, Tirolìxi li sarìa a on pàso da la independensa. A la fésta de Raìxe, a xè fin vignìsto on bociàsa ca insegna l’oniversità ca el cognòse sòlo la situasiòn moderna de la Catalùnya ma ca el ignòra chéla de 25 ani indrìo e ncòra de pì el ignòra chéla Vèneta. On nòstro invià dela Gaxéta el vivea la belesa de 23 àni fà inte el còr del catalanìxmo a la facoltà de jornalìxmo de la Uab (Universitat Autonoma de Barcelona).

La situasiòn 23 ani indrìo la xèra la stésa. In pràtega l’independentìxmo Catalàn el xè a on pònto mòrto. La Gaxéta la ga fésto na anàlixi sénplise ca podémo estendar ànca al sùd Tirol.

1)Na fòrte autonomìa fa chela Catalàna e Tiroléxe, co schèi ca ghe piòve xò da la capitàl e la sensasiòn de libartà ilimità, li crèa on clìma a ndo tùti li se senta so i alòri e li scominsia dormìr sol bachetòn. La xe na sòrta de dròga. Polìteghi e muvimìnti li se cùcia xò e se crèa na mentalità pasìva de on pòpolo ca el speta fàrse incoconàr.

2)I nòmari de dèso, li xè gràndi, Catalùnya e sud Tirol li podarìa deventar independenti inte on dì co on sènplise àto de fòrsa o protesta sivil, li ga i nòmari pa fàrlo. E invese gninte, la pasività la aumenta e tùti li se inpiéna la bòca, ma gnisòn el ga capìo ca gnisòn stàto te darà la independensa o te parmetarà pasivamente de tortela.

In tùti i prosesi de libarasiòn : rivolusiòn, nàsita de stàti, golpe….ghe xé on momento curto o lòngo de ribaliòn, de rotùra. Ghe xé on momento de lòta sensa mediasiòn, na sòrta de tiròn. La conchista de on palàso, na ocupasiòn, on ato intimidatorio, on bloco viario o enerjetego, on atàco, na dixobediensa fiscàl estexa…..Tuti i prosesi de libarasiòn nasionàl li pàsa traverso on àto de fòrsa a ndo se ga da oxàr. El poder el se ciàpa no tye lo dà gnisòn; inte on tèrmeno tecnego la se ciàma “FORSADÙRA”. Sto àto de fòrsa se ga da fàrlo al momento justo inte el lògo jùsto, conpàgno de on pùgno ca mète k.o. l’aversario inte on match de box. Co nàse on nòvo stàto no ghe xé la pàta, ma na vitòria e bàsta. Catalùnya e Tirol no li ga metesto k.o. el so opresòr e gnànca i xe seriamente intensionà fàrlo.

3)La Catalùnya e el sud Tirol, li manca de on piàn e stratejìa de asiòn. Li ga perdesto, in deseni de richèsa e autoconpiasimento, ògni obietìvo e piàn. Co manca la determinasiòn, la lòta la xé perdesta e se vién fagosità. Pa isteso motìvo la itàlia la xé drìo morìr.

4)No xè i nòmari ca fà la stòria. A xé la storiografìa de la sànca ca la inpitùra le màse fa la fòrsa risolutìva de la stòria. Bàle! A xé senpre on sciàpo de òmeni ca ségna la stòria e invitèmo i letùri studiarse co serietà i prosesi rivolusionàri partìr dal proseso de libarasiòn dal colonialìxmo Ingléxe dei Usa. La rivolusiòn Rùsa, chela Fransexe, la nàsita e asexa del Nasìxmo, el Sionìxmo, la màrsa de Mào, Fidel Castro e on sciàpo de òmeni………

Purtròpo chi ca a xé al poder el ne incùlca l’idea ca l’indivìduo el xé na nulità parchè in sto mòdo tùti fémo afidamento so le màse e se autoanulémo. El pastòr co le piègore a lo sa puìto e ghe bàsta on càn pa tignìrghene sentenàri. Eco, la Catalùnya la ga anulà el spìrito rivolusionàrio, individuàl del so movimento e la ga ciapà na stràda mòrta. A xé el steso discòrso dèi dinosàuri, na olta ciapà chela vìa evolusionìsta, la fìne la xèra segnà e gavarìa sopravivèsto e vinsesto na nòva spesie animàl, piceneta ca gnisòn ghe gavarìa dà on schèo.

Eco parché, i Vèneti li rivarà a la Independensa vànti dei coleghi Catalàni.
Share this article :
 
Design Template by panjz-online | Support by creating website | Powered by Blogger